KLIKER

Кога компјутерот би имал душа,

би ги почуствувал ударите по тастатурата,

нулите и единиците во главата,

би ги дознал сите тајни јавно изнесени.

Кога компјутерот би знаел да збори,

би ме молел да му дадам пауза,

би ми зборел за електро – магнетно зрачење,

би ми указал на животно значење.

Кога компјутерот би можел да оди,

би го нарамил куќиштето,

би ја спакувал тастатурата,

би го покрил мониторот,

би ме оставил да ги принтам

мемоарите од еден живот.

Времето е како створено за шоља чај,

се бараат слободни места во муабетчилница.

Местово е како создадено за зимска идила,

се бараат авторите на снежни топки.

Темата е како измислена за пишуванки,

се бараат добри познавачи на зборот.

Снегот ги покрива сите траги,

дури и кучешките.

Мечкините одамна го спијат

зимскиот сон.

Снегот ги покрива сите траги,

дури и врапчешките.

Орловските залутале високо

по планините.

Снегот ги покрива сите траги,

дури и водените.

Кормораните залудно

го кршат мразот,

неуспешно е.

Снегот ги покрива сите траги,

освен љубовните.

Таму каде што љубовта грее,

секоја снегулка хаотично се клати,

секоја воздишка создава лавина,

секоја трага води кон срцето…

Тежината на животот ја носам во клепките,

светлината ја кријам под капаците,

а ведрината ми се оцртува на веѓите.

Во солзите ги топам кристалите,

а боите на среќата ги разложувам

во зеницата…

Почнав да го менувам расположението со тебе,

денот со ноќта, а ноќта со смајлови.

Почнав да ги менувам и годишните времиња:

паѓањето на лисјата со паѓањето на снегот.

Почнав да го менувам природниот амбиент:

долината на никелот со долината на волците.

Почнав да те менувам, да те усмерувам кон мене.

Почнав и јас да се менувам како месечните мени.

Од млада кон полна месечина.

Почнав…

Измислив нов збор. Го брендирав. Сите авторски права над него ги задржувам. Брендот се наоѓа во секоја моја реченица. Кога спојува светови, како сврзник. Кога разделува мисли, во улога на разделувач. Не се преведува на друга јазик, освен на мајчиниот. Не се сведува на необичен, обично стои до интерпункциски знак.

Измислив нов збор. Сега сум во потрага по соговорник.

Моите 35 и твоите сочинуваат непарен број. Не се дели со два, а кога би, би имало остаток.

Моите 35 и твоите образуваат множество од заеднички елементи, а пресекот е секогаш поголем од пет…Стотинки.

Моите 35 и твоите се само години, чуствата не се делат и собираат.

Математички, емоциите не еволуираат.

Оставам…

На газарот малку парфем-

аромите ме враќаат во минатото…

Прашина на рамна површина-

иницијалите се почитливи…

Талог во филџанот-

сервисот мора да се сефтоса…

Празнина во душата-

да има што да се потполнува…

Систем на поврзани садови

Ги измешав течностите

три капки од моето на

полн сад од твоето

и секое прелевање значи

само кружење од

потесно во подлабоко,

од  пошироко во поплитко.

Ги поврзав садовите

комбинирав провидни со солидни

сега течностите се движат

по нашето…

Систем на поврзани зборови

Ги измешав зборовите

три збора од моето

на пола реченица од твоето

значи недоразбирање

во говорот.

Ги поврзав речениците

прости со проширени,

просто – проширени…

Сега сложеноста се мери

според бројот на слогови

при емотивни влогови.

Љубовта се сервира ладна. Секое загревање и го менува вкусот.

Љубовта се декларира независна. Секое коалицирање и го намалува кредибилитетот.

Љубовта се именува со повеќе имиња. Само едно и` е вистинско.

Љубовта се јавува само еднаш. Секоја копија е веќе доживеана.